Act 13 | MED | STEP | Antiyok Got nga rapa tenda wamp mbᵾ kᵾn, ik mbo wu na, painui wu na mat morung. Wu mbᵾ Barnapas kᵾn, Simiyon, mbi ti tek ‘pombra’ nᵾtmᵾn. Ei kᵾn, Siriya kona wu Lusiyus kᵾn, wu Maniyan gapman nga wu ou Erot ni kᵾn etᵾk, ou endᵾtᵾng wu ei kᵾn, Sol kᵾn.

Acts 13

Barnapas, Sol Raⱡ Got Nga Kongun Ila Tᵾk Mundrung

1 Antiyok Got nga rapa tenda wamp mbᵾ kᵾn, ik mbo wu na, painui wu na mat morung. Wu mbᵾ Barnapas kᵾn, Simiyon, mbi ti tek ‘pombra’ nᵾtmᵾn. Ei kᵾn, Siriya kona wu Lusiyus kᵾn, wu Maniyan gapman nga wu ou Erot ni kᵾn etᵾk, ou endᵾtᵾng wu ei kᵾn, Sol kᵾn. 2 Ei kᵾn, wu kᵾⱡ Nuim ei nga kongun endᵾk, rᵾng mowi pek moⱡina, Muⱡnga Wingti ei ndi, wu kᵾⱡ kundpa, nimba mel, “Wu Barnapas, Sol raⱡ, mbi rok ekit tangina, na nga kongun itinggil nᵾmp, wi rop tit, ei mel itinggil,” nitim. 3 Wote, wu kᵾⱡ rᵾng mowi pek atinga rok molk, wu raⱡ nga peng ila ambulk pᵾl nᵾk tᵾk, mundᵾⱡina purᵾnggil.

Saipras Kona Ila Rᵾnang Ik Kai Mbᵾ, Mbo Endᵾtᵾnggil

4 Muⱡnga Wingti ei ndi, Barnapas Sol raⱡ, Selusiya kona ila tᵾpa mundrum. Kona ila pukᵾⱡ molkᵾⱡ, wote nu sip tᵾkᵾⱡ, Saipras kona ila purᵾnggil. 5 Wote, Salamis ni kona ila ruk pukᵾⱡ kᵾn, Jura wamp nga atinga manga kel anggᵾtᵾm mbila, Got nga ik mbᵾ, kundᵾk nᵾtᵾnggil. Ei kᵾn, wu Jon Mak ni, tᵾpa rᵾpᵾndpa kongun itangga nᵾkᵾⱡ, tᵾkᵾⱡ mekᵾⱡ purᵾnggil. 6 Wote wu kᵾⱡ, Salamis mᵾi ila kongun etᵾk, andᵾk pora nduk kᵾn, wote Papos mᵾi ila ok, ekit purung. Papos kona ila nga wu ti, kur atinga ropa, elim painui wu ti ku nitim ei, mbi tek, ‘Barapas,’ nᵾtᵾng. 7 Ni kᵾn, Barapas ni, kona ila nga gapman nga wu kuimbal ei mbi tek, ‘Sergiyus Paulus,’ nᵾtᵾng, ei nga wu puⱡ ei murum. Gapman nga wu kuimbal ei ndi, Barnapas Sol raⱡ, elim kᵾn wunggil nitim. Ei nambuⱡ emel, Got nga ik kai kᵾⱡ, elim pilmba pilpa nitim. 8 Wote, kur atinga rui wu (Grik ik ila ropᵾl rok Elimas nᵾtmin) ni ndi, wu raⱡ nga ik nᵾtᵾnggil mbila ropa akpa, itim. Ei nambuⱡ emel, gapman nga wu kuimbal ei, Got nga ik kupa kᵾⱡ pilpa, ti nᵾtangga nimba itim. 9 Wote, Sol mbi ti tek, Pol nᵾtᵾng ni, Muⱡnga Wingti ei ndi, ronduⱡ nguⱡnga, kur Elimas ni, wu ei kandpa, ronduⱡ mundpa, nimba mel, “Nim Seitan nga kangᵾm ei! Nim uⱡ kai mbᵾ nga pora el rui wu. Nim kᵾn uⱡ kit mbᵾ, peka ropa petᵾm ei nga, rᵾk rᵾk Nuim ei nga uⱡ kupa mbᵾ, nim ndi, etkᵾn ge ndurᵾn. 11 Ei kᵾn akup, Nuim ei nga ki ei ndi, nim rangga, nim mong ei, kit itangga, ant rᵾⱡang ei, kᵾni nᵾkᵾnana, rumbᵾⱡ mat omba pangga!” nitim. Tᵾngᵾnda mint, Elimas pitim ei, kupa rumbᵾⱡ mul kat omba, elim nga mong raⱡ, panda rurum ila, wamp morung kona mbila runum runaim etpa, wamp ti ndi, elim ki ᵾmbᵾⱡeing nimba ᵾndrᵾm. 12 Wote, wu Sergiyus Paulus ni, Gapman nga wu kuimbal ni, uⱡ ei kandpa, Nuim ei nga ik mbo endᵾtᵾng ni pilpa, min ngᵾn mundrum.

Wu Raⱡ Pisiriya Nga Kona Peng Andiyok Ila Orᵾnggil

13 Pol kᵾn elim nga rᵾp wu kᵾⱡ kᵾn, Papos kona molk, nu sip tᵾk puk, Pampiliya nga kona peng Purga nᵾtᵾng ila ekit purung. Kona ila, Jon Mak wu kᵾⱡ, wak ropa Jerusalem int purum. 14 Wu kᵾⱡ, Purga kona ila molk, wote Pisiriya mᵾi kona ila purung. Puk mowi kor ei, Andiyok kor kᵾn, atinga manga kel ila murᵾk puk, mana morung. 15 Wote ila nga, Moses nga mi ik na, wote painui ik na mbᵾ nga, kᵾmp tᵾk pora nduk moⱡᵾngina, atinga manga kel nokundurmᵾn wu mbᵾ ndi, rung mundᵾk nᵾk mel, “Angmᵾn, enim ndi wamp mbᵾ, ndoimp rondᵾk ik mat nimin nᵾk, pilᵾng ndam, nᵾi!” nᵾtᵾng. 16 Wote, Pol ndi anggilpa, ki oⱡa ndupa, nimba mel, “Enim Isrel wamp mbᵾ kᵾn, wote wamp rᵾⱡaip elpa mbᵾ, Got nga mbi paka rondᵾrmin mbᵾ kᵾn, na nga ik ei kum tᵾiya! 17 Tᵾn Isrel wamp nga Got ei ndi, tᵾn nga anda kouwᵾmᵾn mbᵾ, mbi ropa tᵾpa, Isip kona ila, nomba andrᵾng wamp mbᵾ kᵾn, wamp rᵾk tᵾpa etpa mam inditim. Got nga ronduⱡ mam ei ndi, wamp mbᵾ Isip kona ila, mepa ekit urum. 18 Kona kui waka ila wamp mbᵾ nga mbun koma ropa mepa oⱡnga, pana 40 itim. 19 Wote, Keinen mᵾi ila wamp rᵾⱡaip tᵾmbᵾkak, gul raldika ropa mundpa, elim nga Isrel wamp mbᵾ mᵾi ei ngurum. 20 Mᵾi ila pek muⱡina, pana 450 omba purum. Pana ui kᵾⱡ omba puⱡnga, wote Isrel wamp mbᵾ, kᵾmp ting wu mbᵾ tᵾpa mundrum. Molk puⱡina, painui wu Samuwel ni oⱡa urum. 21 Wote, wu king ti, kandᵾk tᵾk, ngui nᵾk mawa elingina, wu Benjamin nga rᵾⱡaip ila, wu Kis kangᵾm Sol ni, tᵾpa king monduⱡnga, moⱡnga pana 40 omba purum. 22 Wote Got ndi, Sol tᵾpa ekit ndupa, Depit tᵾpa, Isrel wamp mbᵾ nga king mundrum. Mondpa kᵾn, Depit kᵾn, nimba mel ‘Na wu Jesi kangᵾm Depit kandᵾp tᵾnt wu ei, na numan ngur. Wu ei ndi, na nga pᵾt uⱡ mbᵾ mel, kapⱡa endᵾmba,’ nitim. 23 Wu Depit nga pundun ila, Isrel wamp nga Etpa Ti Wu ei, Jisas oⱡa omba nimba, Got ndi unt, nimba mᵾi rurum. 24 Jisas ni, kongun iti natilinga kᵾn, Jon ndi, Isrel wamp mbᵾ pora numan ropᵾl rok, nu tᵾi nimba ik mbo inditim. 25 Wote, Jon elim kongun etpa pora ndupa ei kᵾn, wamp mbᵾ waldpa, nimba mel, ‘Enim ndi, na nam nᵾk pᵾnmᵾn? Enim nga nokundᵾk mormin wu ei, na mon! Ei kᵾn, kum tᵾiya! Na nga mbuldung orunga omba wu ei, na ndi, wu ei nga kᵾmp rᵾk kᵾⱡ, na wu kai ti mon! Ei nga, na kapⱡa pᵾtimp mel mon,’ nitim.

26 “Na nga Isrel wamp angmᵾn mbᵾ, wote Aparam nga wamp pundun mbᵾ kᵾn, wote wamp rᵾⱡaip elpa, Got nga mbi paka rondᵾnmin mbᵾ kᵾn pora, etpa ti uⱡ ei nga, rᵾnang ik kai ei, tᵾn kᵾn tᵾpa mundrum. 27 Wote, Jerusalem wamp mbᵾ kᵾn, en enim nga rᵾp wu mbᵾ kᵾn pᵾi, Etpa Ti Wu ei, kandᵾk mbi ndui nandrᵾng. Omba, painui wu mbᵾ nga pai nᵾk, mon rorung ik mbᵾ, mowi kor mbᵾ kᵾn, rᵾk rᵾk kᵾmp rormin ik mbᵾ nga puⱡ mbᵾ kep, pilik kun iti natᵾtᵾng. Wote, Jisas kot endᵾk, etᵾng uⱡ mbᵾ ndi, painui wu mbᵾ nga pai nok nᵾtᵾng ik mbᵾ, omba kupa itim. 28 Wu ei, rok kunding ei nga puⱡ ti, kandᵾk ti natᵾtᵾng. Ei wote, Pailot waldᵾk, wu ei, rop kundamin nᵾkᵾn, ni nᵾtᵾng. 29 Wote, Buk Wingti ila, pai nok mon rorung uⱡ mbᵾ mel etᵾk, kapⱡa endᵾk kᵾn, nde peta ila mana tᵾk, on kona ila tetᵾng. 30 Wote on kona ila, Got ndi, Jisas ni ⱡoporpa tᵾpa kont monduⱡnga, unt rumbᵾⱡ mat ou ndupa, elim kᵾn rᵾp rok, Galili kona ila molk puk, Jerusalem purung wu mbᵾ ndi, kandrung. Wu kᵾⱡ ndi, akup elim nga ik ei nᵾk, tᵾk pena ila pendᵾtmᵾn. 32 Tᵾn ndi, akup Rᵾnang Ik Kai ei, enim nimbun nguimin. Ei kᵾn, Got ndi, Jisas ⱡoporpa tᵾpa mundrum uⱡ ei ndi, tᵾn nga anda kouwᵾmᵾn kᵾⱡ kᵾn, nimba mᵾi rurum uⱡ ei, tᵾn wamp pundun kᵾⱡ, etpa kupa inditim. Uⱡ ei, Buk Sam 2 ila nimba mel,

‘Nim na nga kangᵾm, akup ei kᵾn, na nim nga Tipanᵾm rundi,’ nitim.
34 Wote Got ndi, kangᵾm on kona ila puri nᵾpᵾrangga nimba, ⱡoporpa tᵾpa kont mondᵾmba ei nga ik ti, nimba mel,

‘Na ndi, unt Depit kᵾn nᵾmp, mᵾi rop nguimp nit memp ronduⱡ wingti mbᵾ, akup nim kᵾn nguimp,’ nitim.
35 Ei nga aldpa, Buk Sam ila nimba mel,

‘Nim nga Wu Wingti ei, on kona ila pepa purangga nᵾkᵾn, wak rui nᵾri!’ nitim.
36 Ni kᵾn, tᵾn pᵾtmᵾn ni, king Depit ndi, Got nga numan pitim ei mel, wamp mbᵾ kᵾn, kongun mbᵾ pep ropa itim. Wote koⱡnga kᵾn, tᵾk elim nga anda kouwᵾmᵾn mbᵾ, tetᵾng on kona ila telingina, tepa pururum. 37 Wote Got ndi, Jisas ni, on kona ila ⱡoporpa kont mundrum wu ei, on kona ila tepa puri nᵾpᵾrᵾm mon! 38 Ei kᵾn, Isrel wamp angmᵾn mbᵾ, pilik kun itᵾi! Jisas nga mbi ila, uⱡ kit pendpa kili uⱡ ei nga Rᵾnang Ik Kai ei, enim kᵾn mbo endinmᵾn. 39 Moses nga mi ik kᵾⱡ ndi, tᵾn etpa tᵾpa, wamp kun kai ni nᵾndᵾtᵾm. Wote ya wu ei, mondᵾk pᵾtmᵾn wamp mbᵾ, wamp kun kai nᵾtᵾm. 40 Ei kᵾn, enim tᵾk mendᵾk muⱡᵾi! Unt, ik painui wu kᵾⱡ nga ik nᵾtᵾng uⱡ kᵾⱡ, enim kᵾn omba iti nᵾtangga! 41 Buk Wingti ei ndi, nimba mel,

‘Enim Got nga ik mbᵾ nᵾk, kit mondurmin wamp mbᵾ, enim andᵾk kuⱡing! Ei nambuⱡ emel, na ndi, enim nga ui ila, uⱡ ti itimp ei, wamp ti ndi, enim kᵾn it mat nin ndam, uⱡ ei nga puⱡ ei, enim ndi, kapⱡa mondᵾk pili nᵾpiling!’” nitim.
42 Wote, Pol Barnapas raⱡ, ik mbo endkᵾⱡ pora ndukᵾⱡ, atinga manga kel ni, wak rokᵾⱡ pinggil elinggila, wote wamp morung nimbᵾ ndi, aldpa mowi kor ti kᵾn ok, ik mbᵾ nga mat nᵾnggil ku nᵾtᵾng. 43 Wamp morung nimbᵾ, elpa elpa puⱡᵾngina mel, wamp minal kᵾn, wamp rᵾⱡaip elpa mat, Jura nga uⱡ etmin mbila kᵾn ok, Pol kᵾn Barnapas raⱡ kᵾn, rᵾp rorung. Wu raⱡ ndi, wamp mbᵾ kᵾn, Got nga wamp poⱡ ti uⱡ ila, ronduⱡ mundᵾk pek muⱡᵾi, nᵾk man ngorᵾnggil. 44 Wote, merᵾng mowi kor ti kᵾn, kona peng ila petmin wamp mbᵾ pora, Got ei nga ik ei, pilmin nᵾk ruk orung. 45 Ui ei kᵾn, amp mam ti orung ni, Jura wu mbᵾ kandᵾk, munt mi telinga, popᵾⱡ kulk, Pol nga ik nitim nimbᵾ, rok mana nduk, ik mbuldung orunga nᵾndᵾk etᵾng. 46 Uⱡ ei mel etᵾng ila, wote Pol, Barnapas raⱡ, ronduⱡ mundᵾk, punt rok, nᵾkᵾⱡ mel, “Got nga ik mong ei, enim kuimp tep kundᵾp nimbuⱡ. Ei nga wote, en enim ndi, uⱡ nga kᵾnt nga kont uⱡ ei, mi ronmin kant ei kᵾn, enim wak ropᵾn wamp kᵾⱡ rᵾⱡaip elpa ik ei, kundᵾp ninimbᵾⱡ. 47 Nuim ei ndi, tᵾn mi ik ei, Buk Wingti ei ndi, ei mel nimba ngurum,

‘Na ndi, enim wamp rᵾⱡaip elpa kᵾⱡ nga rᵾⱡang ei mondunt, ei mel molkᵾn, muⱡ kᵾmp mbila, Got nga wamp etpa ti uⱡ ei nga, nᵾkᵾn mekᵾn pi!’” nitim.

48 Wote, wamp rᵾⱡaip elpa ok morung nimbᵾ, ik kᵾⱡ pilik numan ngᵾk, Nuim ei nga ik kᵾⱡ mbi paka rondrung. Wote, uⱡ nga kᵾnt nga kont uⱡ ting wamp mbᵾ, kᵾmp ropa titim mat ila ok, morung nimbᵾ, Got kᵾn mondᵾk pᵾtᵾng. 49 Nuim ei nga ik ei, kona mbila, ndaip nimba purum. 50 Wote, Jura wu nimbᵾ ndi, kona peng ila nga rᵾp wu nimbᵾ kᵾn, rᵾⱡaip elpa amp mbi mul mbᵾ, Got nga mbi paka rondurmun wamp nimbᵾ, kunt roⱡungina, Pol Barnapas raⱡ kᵾn, nᵾk kit mondᵾk, enim nga mᵾi ila muⱡi nᵾmbᵾⱡᵾnggil mon nᵾk, rok makrᵾk mundrung. 51 Ni kᵾn, wu raⱡ en enmbilinga, kᵾmp kᵾnggᵾpᵾn nimbᵾ, kona ila ndanda ndukᵾⱡ, mundkᵾⱡ. I etᵾk pendkᵾⱡ, Andiyok kona ni wak rokᵾⱡ, Aikoniyum kona ila purᵾnggil. 52 Wote, Andiyok kona ila kitip kᵾni wamp nimbᵾ, Muⱡnga Wingti ei ndi, peka roⱡnga, numan kai pilik, ambulk palk morung.